Rumıniya hakimiyyəti aprelin 17-dən etibarən Rusiya bayrağı altında üzən gəmilərin ölkədəki limanlara girişini qadağan edib.
YeniAvropa xarici KİV-ə istinadla xəbər verir ki, bu barədə ölkənin Dəniz Administrasiyasının mətbuat xidməti məlumat yayıb.
“2022-ci il aprelin 17-si yerli vaxtla saat 00:00-dan etibarən Rusiya bayrağı altında üzən, o cümlədən 2022-ci il fevralın 24-dən sonra bayrağını və ya qeydiyyatını digər ölkələrə dəyişən Rusiya gəmilərinin Rumıniya limanlarına daxil olması qadağandır”, - deyə məlumatda bildirilir.
Gəminin yardıma ehtiyacı olduğu və sığınacaq yeri axtardığı, həmçinin təhlükəsizlik səbəbi ilə və ya insanların həyatını xilas etmək məqsədilə limana təcili yanaşmağa ehtiyac duyduğu hallar buna aid deyil.
Bundan başqa, məhdudiyyətlər Avropa İttifaqına qaz, neft və neft məhsulları, titan, alüminium, mis, nikel, palladium, dəmir filizi və bəzi kimyəvi məhsullar, həmçinin sanksiyalar altına düşməyən əczaçılıq, ərzaq, kənd təsərrüfatı məhsulları, gübrələr və nüvə yanacağı, atom elektrik stansiyaları üçün avadanlıq, kömür və digər qazıntı yanacağı daşıyan gəmilərə də şamil edilməyəcək.
2632
2632
