Diaspor Gənclərinin V Yay Düşərgəsi başa çatıb

Laçında təşkil olunmuş “Gənclər Yaşıl Dünya Naminə” Diaspor Gənclərinin V Yay Düşərgəsinin rəsmi bağlanış mərasimi keçirilib.

Komitədən YeniAvropa-ya verilən məlumata görə, əvvəlcə V Yay Düşərgəsinin qısa xülasəsini əks etdirən videoçarx nümayiş olunub.

Sonra Diasporla İş üzrə Dövlət Komitəsinin sədr müavini Elşad Əliyev çıxış edərək, V Yay Düşərgəsinin Azərbaycanın dilbər guşələrindən olan Laçında keçirilməsinin önəmindən danışıb və bu düşərgənin gənclərin yaddaşında silinməz izlər buraxacağına inandığını bildirib. Laçının ilk dəfə dünyanın 60 ölkəsindən gələn qonağa ev sahibliyi etdiyini vurğulayıb.

Ənənə halını alan yay düşərgələrinin xaricdə yaşayan azərbaycanlı gənclərin vətənlə əlaqələrini möhkəmlətmək, öz soykökünə, mədəniyyətinə bağlılığını qoruyub saxlamaq məqsədi daşıdığını söyləyən E.Əliyev, gəncləri diaspor fəaliyyətində və Azərbaycan həqiqətlərinin təbliğində fəal olmağa çağırıb.

Sədr müavini bu cür tədbirlərin vətənpərvər gənclərin informasiya müharibəsində üstünlük qazanmasında, dezinformasiyaların qarşısının alınmasında çox ciddi rol oynadığını diqqətə çatdırıb.

Daha sonra çıxış edən Laçın rayonunda Azərbaycan Respublikası Prezidentinin Xüsusi Nümayəndəliyinin rəsmisi Hüseyn Quliyev düşərgənin Laçında keçirilməsinin böyük əhəmiyyət daşıdığını vurğulayıb və bildirib ki, belə bir tədbir - dünyanın 60 ölkəsindən 115 gəncin Laçında olması, düşərgədə iştirak etməsi çox qürurverici hadisədir. O, bu cür tədbirlərin gələcəkdə də Laçında keçiriləcəyinə ümidini ifadə edib.

Sonda düşərgə iştirakçılarına sertifikatlar, breyn rinq və futbol oyunlarının qaliblərinə mükafatlar təqdim olunub.

Qeyd edək ki, avqustun 1-dən 7-dək davam edən və diaspor tarixinin mühüm layihələrindən hesab olunan Diaspor Gənclərinin V Yay Düşərgəsində dünyanın 60 ölkəsindən 115 gənc iştirak edib. Onların sırasında həm dünyanın müxtəlif ölkələrində yaşayan azərbaycanlılar, həm də Azərbaycana dost münasibəti bəsləyən xalqların nümayəndələri yer alıb.