logo

Gələn həftə ölkədə hava şəraiti nisbətən sabit keçəcək

17:27 14-01-2023 | icon 329
Gələn həftə ölkədə hava şəraiti nisbətən sabit keçəcək

Ekologiya və Təbii Sərvətlər Nazirliyinin Milli Hidrometeorologiya Xidmətinin yanvarın 14-nə olan məlumatına əsasən hava arabir yağıntılı olub, dağlıq ərazilərdə qar yağıb.

Xidmətdən  YeniAvropa-ya bildirilib ki, qar örtüyünün hündürlüyü Lerikdə 24, Qobustanda 18, Altıağacda 17, Qaxda 11, Yardımlıda 10, Qusar, Zaqatalada 9, Xaltanda 8, Göytəpə, Daşkəsəndə 7, Göygöldə 6, Şəkidə və Qəbələdə 4 santimetr olub.

Cənub-şərq küləyi əsib, Xaçmazda saniyədə 18, Şabranda 16 metrədək güclənib.

Çilov adası, Daşkəsən, Göygöl, Şəmkir, Qəbələ, Şəki, Şamaxı, Qobustan, Quba, Göyçay, Hacıqabul, Lerikdə duman müşahidə olunub, görmə məsafəsi 500 metrədək məhdudlaşıb.

Havanın temperaturu yanvarın 13-də Bakıda iqlim normasından 1°-dək aşağı olub. Belə ki, havanın minimal temperaturu Bakıda və Abşeron yarımadasında 2-5° isti, Naxçıvan Muxtar Respublikasında 6-13°, dağlıq rayonlarda 8-11° şaxta, aran rayonlarında 2°-dək şaxta təşkil edib.

Gələn həftə ərzində ölkə ərazisində hava şəraitinin nisbətən sabit keçəcəyi gözlənilir. Əsasən yağmursuz hava şəraitinin üstünlüyü, lakin bəzi şərq rayonlarında və Abşeron yarımadasında səhər saatlarında duman, çiskinli olacağı proqnozlaşdırılır. Mülayim cənub-şərq küləyi əsəcək. Havanın temperaturu tədricən yüksələrək iqlim normasına yaxınlaşacaq. Gündüz saatlarında Bakıda və Abşeron yarımadasında 5-7° isti, dağlıq rayonlarda 0-5° şaxta, aran rayonlarında 5-8° isti olacağı ehtimal edilir.