Sahibə Qafarova: Ermənistan tarixi Azərbaycan torpaqlarında yaradılıb

Azərbaycanın beynəlxalq səviyyədə tanınmış ərazilərinin 20 faizini 30 ilə yaxın işğal altında saxlayan təcavüzkar Ermənistan bütün şəhər və kəndlərimizi dağıdıb, ölkəmizin bütün tarixi, mədəni və dini abidələri vandalizmə məruz qoyub. Ermənistan bu ərazilərdə etnik təmizləmə həyata keçirib. Həm mülki, həm də hərbçi olmaqla, 4 minə yaxın Azərbaycan vətəndaşı Birinci Qarabağ müharibəsi zamanı itkin düşüb ki, işğalçı tərəf onların taleyi barədə məlumat vermir. Etnik təmizləmə nəticəsində bir milyondan çox azərbaycanlı işğal olunmuş ərazilərdən məcburi köçkün və Ermənistandan qaçqın vəziyyətinə düşüb.

YeniAvropa xəbər verir ki, bu fikirləri Milli Məclisinin sədri Sahibə Qafarova Antalyada keçirilən Asiya Parlament Assambleyasının 13-cü plenar sessiyasının rəsmi açılış mərasimindəki çıxışında ifadə edib.

Milli Məclisin sədri Ermənistanda yaşayan azərbaycanlıların öz doğma torpaqlarından hətta münaqişə başlamazdan əvvəl qovulduğunu qeyd edərək, tarixi xəritələrin və sənədlərin müasir Ermənistanın tarixi Azərbaycan torpaqlarında yaradıldığını və azərbaycanlıların bu ərazilərdə əsrlər boyu yaşadıqlarını tədbir iştirakçılarının diqqətinə çatdırıb. S.Qafarova bildirib ki, tarixi şəhərimiz İrəvan 1918-ci ildə Ermənistanın paytaxtı elan edilib. 1920-ci ildə isə sovet hökumətinin qərarı ilə Zəngəzur Azərbaycandan qoparılaraq Ermənistana birləşdirilib. Bu da Azərbaycanın digər əraziləri ilə özünün tərkib hissəsi olan Naxçıvan regionu və Türkiyə ilə coğrafi əlaqəsinin kəsilməsinə gətirib çıxarıb.

Bu ərazilərdə yaşayan azərbaycanlıların XX əsrdə bir neçə dəfə deportasiyaya məruz qaldığını qeyd edən Milli Məclisin sədri deportasiyaların son mərhələsinin 1988-1991-ci illərdə baş verdiyini deyib. Bildirilib ki, erməni tərəfi Qarabağda olduğu kimi, Qərbi Azərbaycanda da tarixi irsimizi məhv etmək məqsədilə bütün tarixi və dini abidələrimizi dağıdıb, Azərbaycan mənşəli şəhər və kəndlərin adlarını dəyişdirib.