logo

Azərbaycan ombudsmanı Polşada ATƏT-in tədbirlərində iştirak edir

16:06 05-09-2022 | icon 1057
Azərbaycan ombudsmanı Polşada ATƏT-in tədbirlərində iştirak edir

Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva Polşanın Varşava şəhərində Avropada Təhlükəsizlik və Əməkdaşlıq Təşkilatı (ATƏT) regionuna daxil olan ölkələrin milli insan hüquqları institutlarının rəhbərlərinin iclasında iştirak edir.

Ombudsman Aparatının mətbuat xidmətindən YeniAvropa-ya bildirilib ki, ATƏT-in Demokratik İnstitutlar və İnsan Hüquqları Bürosu tərəfindən təşkil edilmiş yüksəksəviyyəli iclasa Azərbaycanla yanaşı, 33 ölkənin milli insan hüquqları institutunun (MİHİ) rəhbər və nümayəndələri qatılıblar. Tədbirdə, həmçinin Birləşmiş Millətlər Təşkilatı, Avropa İttifaqı və Avropa Şurasının, eləcə də Milli İnsan Hüquqları İnstitutlarının Qlobal Alyansı, Milli İnsan Hüquqları İnstitutlarının Avropa Şəbəkəsi, Avropa Bərabərlik Qurumları Şəbəkəsi və Beynəlxalq Ombudsman İnstitutunun nümayəndələri iştirak edirlər.

İclasda ATƏT regionunda MİHİ-lərin müstəqilliyinin artırılmasına, onların qarşılaşdığı çətinliklərin aradan qaldırılmasına və bu təsisatların olmadığı ölkələrdə də yaradılmasının təşviqinə dəstək verilməsi məqsədilə müzakirələr aparılması nəzərdə tutulub.