logo

Dövlət Xidməti icarə haqqı tələbi ilə “Sədərək”i məhkəməyə verdi 

16:58 29-07-2022 | icon 1407
Dövlət Xidməti icarə haqqı tələbi ilə “Sədərək”i məhkəməyə verdi 

Əmlak Məsələləri Dövlət Xidməti(ƏMDX) “Sədərək” Ticarət Mərkəzindən icarə müqaviləsi bağlanılmasını tələb edir.

YeniAvropa xəbər verir ki, qurum iddia edir ki, Ticarət Mərkəzi dövlətə məxsus torpaq ərazisində fəaliyyət göstərməsinə baxmayaraq, bu müddət ərzində Əmlak Məsələləri Komitəsinə(indiki ƏMDX) icarə pulu ödənilməyib.

ƏMDX artıq “Sədərək” barəsində məhkəmə iddiası da qaldırıb. İddia Bakı Kommersiya Məhkəməsində icraata götürülüb. İşə hakim İlham Əhmədovun sədrliyi ilə baxılır.

Mübahisə ilə bağlı maraqlı məqamlardan biri də Bakı şəhər İcra Hakimiyyətinin məhkəməyə maraqlı şəxs qismində cəlb olunmasıdır. Belə ki, “Sədərək” firması bu günə qədər BŞİH-in sərəncamı əsasında fəaliyyət göstərirmiş.

Qeyd edək ki, "Sədərək" Ticarət Mərkəzi Qafqazın ən böyük topdansatış bazarı hesab olunur. Ərazisi 30 hektardan çox olan ticarət mərkəzinin rəhbəri iş adamı Yusif Qədimbəylidir.