"İran Azərbaycan sərhədlərində dünyada ironiya və gülüş doğuran hərbi təlimlər keçirir"

Deputatın sözlərinə görə, dəqiq faktlar və arqumentlər sübut edir ki, İran nəinki işğal dövründə, hətta 44 günlük müharibə zamanı və ondan sonra da Ermənistanın, Qarabağdakı separatçıların tör-töküntülərinin yanında olub və onlara silah-sursat, ərzaq, yanacaq göndərməyə davam edib: “Onlar son günlərə qədər Azərbaycanın ciddi etirazının olmasına baxmayaraq, buna cəhd etsə də, nəhayət, atılmış olan qəti addımlarla separatçı rejimin silah-sursat, ərzaq, yanacaqla təmin olunmasının qarşısı alınıb. Azərbaycanın bununla bağlı rəsmi mövqeyini ortaya qoymasına, diplomatik kanallarla İranın rəsmi qurumlarına xəbardarlıq etməsinə və səfirinin Xarici İşlər Nazirliyinə çağrılaraq ona etiraz notasının verilməsinə baxmayaraq, İran yenə də öz əməllərindən əl çəkmədiyindən, Azərbaycan daha konkret addımlar atmaq məcburiyyətində qaldı".

F.Ağamalı deyib ki, Gorus-Qafan yolunda qəhrəmanlarımız olan polis və sərhədçilərimizin iştirakı ilə post qurulub: "Bu postun qurulması isə İranı xeyli qəzəbləndirib. Bunun müqabilində isə Azərbaycanla sərhəd ərazilərdə bütün qoşun növünü yerləşdirərək hərbi təlimlərə start verib. Hər zaman İranın hakim dairələri Azərbaycana qarşı qeyri-səmimi, riyakar, ikiüzlü siyasət həyata keçirib. Bir tərəfdən, guya bizim ərazi bütövlüyümüzü tanıdığını dilucu etiraf edir, digər tərəfdən isə Ermənistanı gücləndirməyə çalışır, Qarabağda, tarixi ərazilərimizdə erməni separatçılarının tör-töküntülərinə hərtərəfli yardım göstərməkdən belə çəkinməyib. Bu isə mehriban qonşuluq münasibətlərinə, islami dəyərlərə, beynəlxalq hüquq normalarına heç cür uyğun gəlməyən davranışdır”.

F.Ağamalı qeyd edib ki, Azərbaycanın bütün diplomatik normalara, etik qaydalara uyğun olan xəbərdarlıqlarını, Azərbaycan cəmiyyətinin “molla rejimi”nə qarşı sərt etirazını və reaksiyasını nəzərə almayan və nəticə çıxarmayan İranın rəsmi dairələri ən müxtəlif şəkildə ölkəmizə hədə-qorxu gəlməkdən belə çəkinmirlər: “Bir tərəfdən, Ayətullanın vasitəsilə Azərbaycana hədələr gəlir, başqa bir tərəfdən İranın dini lideri tərəfindən Azərbaycanın adı çəkilmədən ölkəmizə qarşı ciddi təhdidlər ortaya qoyulur. Bütün bunlardan isə daha çox qabağa gedən İranın xarici işlər naziri Hüseyn Əmir Abdullahian Azərbaycanı hədələməkdən belə çəkinmir və separatçılara aparılan yüklərlə bağlı Azərbaycanın reaksiyasının qəbuledilməz olduğunu rəsmi şəkildə elan edir. Azərbaycan müstəqillik qazandıqdan bəri İrana qarşı qonşuluq münasibətlərini əsas gətirərək çox səmimi, dostluq münasibətləri nümayiş etdirib. Vaxtilə ABŞ İrana qarşı sərt mövqe ortaya qoyanda və ölkəmizin imkanlarından istifadə etməyə cəhd göstərəndə Prezident İlham Əliyev tərəfindən birmənalı mövqe səsləndirildi ki, İrana qarşı Azərbaycandan üçüncü bir dövlətin bu və ya digər şəkildə fəaliyyətinə imkan verilməyəcək. Azərbaycan bu günə qədər həmin mövqeyini nümayiş etdirməkdədir. Ancaq İran vaxtilə ABŞ-a, İngiltərəyə, Avropaya qarşı istifadə etdiyi "sionizm epiteti" ilə indi də Azərbaycanı hədəfə alıb”.

Deputat bildirib ki, Azərbaycan müstəqil dövlətdir və kiminlə hansı formada münasibət qurması onun hüququdur: “İran rəsmiləri anlamalı, başa düşməlidir ki, bu, Azərbaycanın müstəsna səlahiyyətidir. Heç bir dövlətə digər dövlətin daxili işlərinə qarışmaq səlahiyyəti verilməyib. Bu, mahiyyət etibarilə digər dövlətə təcavüz kimi qiymətləndirilir. Azərbaycan illərdir ki, bir çox ölkələrlə, o cümlədən, İsraillə münasibətlərini qoruyub saxlayır və ən yüksək səviyyədə davam etdirir. İsrail və Azərbaycan xalqları arasında əsrlərə söykənən dostluq və qardaşlıq münasibətləri var. Məhz hər iki dövlət arasındakı münasibətlər də ilk olaraq buna söykənir. Bu gün Azərbaycan xalqı dəmir yumruq kimi dövləti və Prezident, Ali Baş Komandanı ətrafında sıx birləşib. “Molla rejimi”nin gülüş doğuran bu şouları Azərbaycan xalqının iradəsinə zərrə qədər mənfi təsir göstərmir və göstərməyəcək. Əksinə, bu, Azərbaycan xalqını və dünya azərbaycanlılarını Dövlətimizin, Prezidentimizin, Ordumuzun ərtafında daha sıx şəkildə birləşdirir. Bu cür cəhdlər, şoular, mənasız və populist bəyanatlar Azərbaycanın mövqeyinə və dövlətçiliyinə zərrə qədər təsir göstərməyəcək”./"Report"