logo

Gənclər və idman naziri Fərid Qayıbov kollektivə təqdim edilib

11:01 08-09-2021 | icon 406
Gənclər və idman naziri Fərid Qayıbov kollektivə təqdim edilib

Prezident İlham Əliyevin ötən gün imzaladığı Sərəncama əsasən gənclər və idman naziri vəzifəsinə təyin edilmiş Fərid Qayıbov sentyabrın 8-də kollektivə təqdim olunub.

YeniAvropa xəbər verir ki, yeni naziri kollektivə Prezident Administrasiyasının Gənclər siyasəti və idman məsələləri şöbəsinin müdiri, birinci vitse-prezidentin köməkçisi Yusuf Məmmədəliyev təqdim edib.

Yusuf Məmmədəliyev tədbirdə çıxış edərək dövlət başçısının sentyabrın 7-də imzaladığı müvafiq sərəncamı diqqətə çatdırıb, Fərid Qayıbovu təyinat münasibətilə təbrik edib, ona fəaliyyətində uğurlar arzulayıb. Bildirilib ki, Fərid Qayıbov bir sıra məsul vəzifələrdə fəaliyyət göstərib, o cümlədən Avropa Gimnastika İttifaqının (UEG) prezidenti vəzifəsində çalışıb.

Təqdimat mərasimində çıxış edən Fərid Qayıbov göstərilən yüksək etimada görə prezident İlham Əliyevə minnətdarlığını bildirib.

Tədbirdə idman federasiyalarının rəhbərləri, ölkəmizin idman ictimaiyyətinin nümayəndələri iştirak ediblər.