logo

Üzgüçümüz Raman Saleh "Tokio-2020"də üçüncü qızıl medal üçün yarışacaq

09:09 03-09-2021 | icon 2541
Üzgüçümüz Raman Saleh "Tokio-2020"də üçüncü qızıl medal üçün yarışacaq

Azərbaycan üzgüçüsü Raman Saleh növbəti dəfə Tokio Paralimpiadasının finalına vəsiqə qazanıb.

YeniAvropa xəbər verir ki, 100 metr məsafəyə butterfly üsulla üzgüçülük yarışının təsnifat mərhələsində 58,99 saniyəlik göstərici ilə birinci olub və əsas mərhələyə adlayıb.

R.Saleh 100 metr məsafəyə arxası üstə və sərbəst üsulla üzmə yarışlarında ölkəmizin aktivinə iki qızıl medal yazdırıb. O, 50 metr məsafəyə sərbəst üsulla üzgüçülük yarışında isə dördüncü yeri tutub.

Hazırda Azərbaycan komandasının hesabında 16 medal var. Onlardan 11-i qızıl, 1-i gümüş və 4-ü isə bürüncdür. Paracüdoçular Şəhanə Hacıyeva (48 kq), Sevda Vəliyeva (52 kq), Xanım Hüseynova (63 kq), Vüqar Şirinli (60 kq), Hüseyn Rəhimli (81 kq), Dürsədəf Kərimova (+70 kq) qızıl, Namiq Abaslı (66 kq) və İlham Zəkiyev (+100 kq) bürünc medala sahib olublar.

Yüz metr məsafəyə arxası üstə və sərbəst üsulla üzgüçülük yarışlarında Raman Saleh Paralimpiya çempionu adını qazanıb. Digər üzgüçümüz Vəli İsrafilov isə 100 metr məsafəyə brass üsulu ilə üzgüçülük yarışında birinci yeri tutub. Nizəatma yarışında dünya rekordu müəyyənləşdirən para-atletimiz Həmid Heydəri qızıl medala sahib olub. Elvin Astanov nüvəitələmə yarışında birinci, Səid Nəcəfzadə isə uzunluğa tullanmada üçüncü yeri tutublar. Para-atlet Lamiyə Vəliyeva 100 metr məsafəyə qaçış yarışını ikinci pillədə başa vurub. Pauerliftinqçi Pərvin Məmmədov (49 kq) fəxri kürsünün üçüncü pilləsinə qalxıb.