Qırğızıstan və Tacikistanın sərhəd xidmətləri qoşunları Oş vilayətinin Çon-Alay rayonunun Unju-Bulak məntəqəsindən daimi dislokasiya yerinə qaytarıblar.
YeniAvropa yerli mətbuata istinadla xəbər verir ki, bu barədə Qırğızıstanın Milli Dövlət Təhlükəsizliyi Komitəsinin sərhəd xidməti məlumat yayıb. “Qırğızıstan-Tacikistan dövlət sərhədinin delimitasiyası və demarkasiyası üzrə hökumət nümayəndə heyətləri arasında danışıqların nəticəsinə əsasən əlavə qüvvə və vasitələrin sərhəd xəttindən geri çəkilməsi başa çatdırılıb”, - deyə idarənin mətbuat xidmətindən bildiriblər.
Hazırda Qırğızıstanın Unju-Bulak məntəqəsində vəziyyət sabitləşsə də, sərhəd xidmətinin bölmələri güçləndirilmiş rejimdə fəaliyyət göstərirlər.
Bir gün əvvəl Qırğızıstan və Tacikistan nümayəndələri qoşunları birgə sərhəddən uzaqlaşdırmaq, sərhəd postlarını isə ölkənin 3 kilometr dərinliyinə çəkmək barədə razılığa gəliblər.
Xatırladaq ki, aprelin 29-da Qırğızıstan və Tacikistanın sərhədyanı rayonlarında yerli əhali arasında başlayan növbəti münaqişə sərhədçilərin silahlı qarşıdurması ilə nəticələnib. Qarşıdurma nəticəsində Qırğızıstanın 36 vətəndaşı həlak olub, 200-ə yaxın insan yaralanıb. Tacikistan isə 19 vətəndaşının öldüyünü, 87 nəfərin isə xəsarət aldığını bildirib.
3885
3885
