logo

Bu gündən Bakı küçələri "Formula-1" yarışı üçün mərhələlərlə bağlanır

15:25 31-03-2021 | icon 252
Bu gündən Bakı küçələri "Formula-1" yarışı üçün mərhələlərlə bağlanır

Bakıda növbəti "Formula-1" yarışı iyunun 4-6-da baş tutacaq. Bununla bağlı Azərbaycan Qran-Prisinin təşkilatçısı “Bakı Şəhər Halqası” (BŞH) Əməliyyat Şirkəti paytaxtın yarış trekinin üzərinə düşən mərkəzi küçələrində gecə saatlarında tikinti-quraşdırma işlərinə başlayır.

YeniAvropa xəbər verir ki, bu barədə BŞH-dən bildirilib.

Qeyd edilib ki, martın 31-dən başlayaraq Puşkin və Xaqani küçələrinin kəsişməsi arasındakı ərazidən Bülbül prospekti istiqamətində olan yolun üzərində beton bloklar şəklində olan təhlükəsizlik baryerlərinin quraşdırılmasına start verilir. Tikinti-quraşdırma işlərinin aparılması saat 22:00-dan 06:00-dək planlaşdırılıb.

Bütün bunları nəzərə alaraq sürücülərdən xahiş olunur ki, avtomobillərini həmin saatlarda Xəqani küçəsində park etməsinlər. Əks halda qeyd olunan ərazidə park edilmiş avtomobillər başqa yerə aparılacaq.

Həmçinin, yolun qeyd olunan hissələrində aparılan təmir-tikinti işlərini nəzərə alaraq, gecə vaxtı yarana biləcək yol qəzalarının və digər xoşagəlməz halların qarşısının alınması məqsədilə sürücülərdən avtomobili idarə edərkən daha diqqətli olmaları və sürət həddini aşmamaları xahiş olunur.

Ümumilikdə yarış trekinin tikinti-quraşdırma işləri 2021-ci ilin iyun ayınadək davam edəcək. "Formula-1" trekinin Puşkin və Xaqani küçələrinin kəsişməsindən Bülbül prospekti istiqamətində olan əraziyədək kəsiyində tikinti işlərinin aprelin 15-dək yekunlaşması gözlənilir. Göstərilən iş qrafikində hava şəraitindən asılı olaraq dəyişikliklər ola bilər.