Gürcüstandan idxal edilən 20 ton quş ətində zərərli maddə aşkarlandı

Gürcüstandan ölkəmizə idxal edilən “Chirina” LTD şirkətinin “Biu-Biu” əmtəə nişanlı 20 ton dondurulmuş toyuq əti məhsuluna baxış keçirilib.

YeniAvropa xəbər verir ki, bu barədə Azərbaycan Qida Təhlükəsizliyi Agentliyinin(AQTA) İnformasiya təminatı və innovativ həllər şöbəsindən bildirilib. 

Verilən məlumata görə, həyata keçirilən nəzarət tədbirləri çərçivəsində Gürcüstandan ölkəmizə idxal edilən “Chirina” LTD şirkətinin “Biu-Biu” əmtəə nişanlı 20 ton dondurulmuş toyuq əti məhsuluna baxış keçirilib.

Baxış zamanı idxal olunan məhsullardan nümunələr götürülərək Qida Təhlükəsizliyi İnstitutunun müvafiq laboratoriyasına təqdim olunub. Aparılan müayinələr nəticəsində bir neçə istehsal tarixləri ilə daxil olan məhsul partiyalarında (istehsal tarixi ötən il 3 və 12 oktyabr olan, ümumi çəkisi 3,07 ton) salmonella patogen mikroorqanizmləri aşkarlanıb.

Qeyd edək ki, ötən il ərzində Gürcüstandan ölkəmizə idxal edilən “Chirina” LTD şirkətinə məxsus müxtəlif şəkildə dondurulmuş toyuq məhsullarında da salmonella patogen mikroorqanizmləri aşkarlanıb və məhsulların satışına qadağa qoyulub, bununla əlaqədar Gürcüstanın Milli Qida Agentliyinə məlumat təqdim olunub. Gürcüstanın Milli Qida Agentliyindən “Chirina” LTD şirkətinin rəsmi nəzarətə götürüldüyü, sağlamlaşdırıcı tədbirlərin görüldüyü barədə Qida Təhlükəsizliyi Agentliyinə zəmanət məktubu təqdim edilib və həmin məlumat əsasında yenidən həmin şirkətə məxsus dondurulmuş toyuq məhsullarının idxalına icazə verilib. Lakin həyata keçirilən yoxlama-nəzarət tədbirləri zamanı növbəti dəfə Gürcüstandan ölkəmizə idxal edilən həmin şirkətə məxsus dondurulmuş toyuq məhsullarında salmonella patogen mikroorqanizmləri aşkar edilib.

Agentlik istehlaka yararsız məhsulların məhv edilməsi ilə əlaqədar qərar qəbul edib və hazırda qanunvericiliyin tələblərinə uyğun olaraq müvafiq tədbirlər görülür.

Qida Təhlükəsizliyi Agentliyi bir daha sahibkarları diqqətli olmağa və normativ hüquqi aktların tələblərinə uyğun məhsulların idxalını həyata keçirməyə çağırır.