logo

“Eurovision-2021”də Azərbaycanı təmsil edəcək mahnının seçimi başlayıb

09:39 08-01-2021 | icon 4914
“Eurovision-2021”də Azərbaycanı təmsil edəcək mahnının seçimi başlayıb

“Eurovision-2021" müsabiqəsində Azərbaycanı təmsil edəcək mahnının seçimi üzrə qəbula başlanılıb.

 YeniAvropa xəbər verir ki, bu barədə müsabiqənin Azərbaycanda rəsmi yayım hüququna sahib İctimai Televiziya və Radio Yayımları Şirkətinin(İTV) mətbuat xidmətindən bildirilib.

Qeyd edilib ki, “Eurovision-2021” üçün mahnı seçimində iştirak etmək istəyənlər yanvarın 19-dək öz mahnılarını [email protected] elektron ünvanına göndərə bilərlər.

İTV may ayında Hollandiyanın Rotterdam şəhərində keçiriləcək “Eurovision-2021”” mahnı müsabiqəsində ölkəmizi təmsil edəcək mahnının seçiminə dair şərtlərini də açıqlayıb.

Şərtlərdə bildirilir ki, göndəriləcək mahnı demo versiyada hazır şəkildə səsləndirilmiş olaraq təqdim edilməlidir. Avropa Yayım İttifaqının (EBU) şərtlərinə əsasən, mahnının xronometrajı 3 dəqiqədən çox olmamalıdır. Mahnı 2020-ci il sentyabrın 1-dən əvvəl ictimai resurslarda və KİV-də (televiziya, radio və ya internet vasitəsilə) yayımlanmamalıdır. Mahnı seçimi turunda iştirak edəcək hər kəs özü haqqında qısa məlumat təqdim etməlidir.

Qeyd edək ki, mayın 18, 20 və 22-də Rotterdamda baş tutacaq “Eurovision-2021” mahnı müsabiqəsində ölkəmizi “Efendi” adlı ifaçı təmsil edəcək.

Müsabiqədə Azərbaycan nümayəndə heyətinin rəhbəri isə bəstəkar İsa Məlikovdur.