logo

Ramiz Mehdiyevin yerinə sədr seçiləcək

15:09 04-09-2020 | icon 1190
Ramiz Mehdiyevin yerinə sədr seçiləcək

Korrupsiyaya Qarşı Mübarizə üzrə Komissiyanın yaxın vaxtlarda iclasının keçirilməsi gözlənilir.

 YeniAvropa xəbər verir ki, iclasda Komissiya üzvləri özlərinə yeni sədr seçəcəklər.

Qeyd edək ki, Korrupsiyaya Qarşı Mübarizə üzrə Komissiya 15 üzvdən ibarətdir. Onlardan 5-i prezident,  digər 5 üzv Milli Məclis, qalanları isə Konstitusiya Məhkəməsi tərəfindən təyin olunurlar.

Milli Məclisin 2020-ci il 5 iyun tarixli qərarı ilə deputatlar Adil Əliyev, Əminə Ağazadə, Elşad Mirbəşiroğlu, Arzu Nağıyev və parlament Aparatının rəhbəri Səfa Mirzəyev Komissiyanın üzvü təyin edilib.

Avqustun 26-da Konstitusiya Məhkəməsi Komissiyaya Baş prokuror Kamran Əliyevi üzv təyin edib. K.Əliyev bu vəzifədə keçmiş Baş prokuror Zakir Qaralovu əvəzləyib.

Bununla yanaşı, Konstitusiya Məhkəməsinin sədri Fərhad Abdullayev, ədliyyə naziri, Məhkəmə-Hüquq Şurasının sədri Fikrət Məmmədov, Ali Məhkəmənin sədri Ramiz Rzayev, Vəkillər Kollegiyasının Rəyasət Heyətinin sədri Anar Bağırov da Komissiyanın üzvləridir.

Avqustun 31-də isə prezident İlham Əliyevin sərəncamı ilə Prezident Administrasiyasının rəhbəri Samir Nuriyev, prezidentin köməkçisi – Prezident Administrasiyasının Hüquq mühafizə orqanları ilə iş şöbəsinin müdiri Fuad Ələsgərov, Prezident Administrasiyasının Qanunvericilik və hüquq siyasəti şöbəsinin müdiri, birinci vitse-prezidentinin köməkçisi Gündüz Kərimov, daxili işlər naziri Vilayət Eyvazov, Dövlət Təhlükəsizliyi Xidmətinin rəisi Əli Nağıyev Komissiyaya üzv təyin olunublar.

Xatırladaq ki, Korrupsiyaya qarşı mübarizə üzrə Komissiya 2004-cü ilin 3 martında yaradılıb. Qurum korrupsiyanın qarşısının alınması sahəsində ixtisaslaşmış orqanın funksiyalarını həyata keçirir. Son vaxtlaradək Korrupsiyaya Qarşı Mübarizə üzrə Komissiyanın sədri Prezident Administrasiyasının keçmiş rəhbəri Ramiz Mehdiyev olub.