Yanvarın 9-da qadın voleybolçulardan ibarət Azərbaycan millisi Avropa Olimpiya Təsnifat Turnirində növbəti oyununu keçirib.
YeniAvropa xəbər verir ki, millimiz Niderlandın Apeldorn şəhərində Bolqarıstan yığması ilə qarşılaşıb. Görüş bolqarıstanlı voleybolçuların 3:1 hesablı qələbəsi ilə yekunlaşıb.
Xatırladaq ki, millimiz ilk oyununda Niderlanda məğlub olub -0:3.
Səkkiz ölkənin mübarizə apardığı yarış “Tokio 2020” Yay Olimpiya Oyunlarına Avropadan sonuncu iştirakçının adını müəyyənləşdirəcək. Təsnifat turnirinin iştirakçıları axırıncı qitə çempionatının nəticələrinə əsasən bəlli olub.
Azərbaycan millisi A qrupunda Niderland, Bolqarıstan və Polşa milliləri ilə birgə mübarizə aparır. B qrupunda isə Türkiyə, Almaniya, Xorvatiya və Belçika milliləri öz güclərini sınayırlar. Turnirin qalibi Olimpiadaya bilet sifariş edəcək.
Qeyd edək ki, millimiz qrupda sonuncu oyununu yanvarın 10-da Polşaya qarşı keçirəcək.