logo

Cüdoçumuz Elmar Qasımov idman karyerasını bitirib

15:55 27-02-2023 | icon 1351
Cüdoçumuz Elmar Qasımov idman karyerasını bitirib

Çoxsaylı beynəlxalq turnirlərin qalibi və mükafatçısı Elmar Qasımov peşəkar cüdo karyerasını bitirməyə qərar verib.

YeniAvropa xəbər verir ki, o, bu barədə Azərbaycan Cüdo Federasiyasını məlumatlandırıb.

Elmar Qasımov bildirib ki, cüdo onun həyatında mühüm rol oynayıb: “Karyeram boyu hər zaman dövlət başçısı İlham Əliyevin bütün idmançılara olduğu kimi, mən də diqqətini və qayğısını hiss etmişəm və buna görə də Azərbaycan prezidentinə dərin minnətdarlığımı bildirirəm. Həmçinin bu yolda məni müşayiət edən məşqçilərimə – Fərhad Məmmədova, Əli Dəvrişova, Ağayar Axundzadəyə, Hacıağa Hacıəhmədova, Mövlud Mirəliyevə, o cümlədən əldə etdiyim nailiyyətlərdə mənə dəstək olan Azərbaycan Cüdo Federasiyasına, milli yığmanın tibbi və texniki heyətinə təşəkkürümü bildirirəm. Hazırda hədəflərim başqadır və diqqətimi yeni planlarıma yönəltmək istəyirəm”.

İdmançı karyerası müddətində çoxsaylı uğurlara imza atıb. O, 2016-cı il Rio Yay Olimpiya Oyunlarının gümüş medalçısı olmaqla yanaşı, 2009-cu ildə İrəvanda keçirilən gənclərin Avropa çempionatında qızıl medal qazanaraq himnimizi səsləndirib və bayrağımızı qaldırıb. Elmar Qasımov dünya çempionatının bürünc mükafatçısı və Avropa çempionatının üçqat mükafatçısıdır. İki dəfə nüfuzlu “Masters” turnirinin qalibi olan cüdoçu “Böyük dəbilqə” və Qran-Pri yarışlarında, ümumilikdə 18 medal qazanıb.