logo

Bakı-Sumqayıt yolundakı tikilidə yanğın baş verib

11:33 18-02-2023 | icon 11473
Bakı-Sumqayıt yolundakı tikilidə yanğın baş verib

Fövqəladə Hallar Nazirliyinin(FHN) 112 - qaynar telefon xəttinə Abşeron rayonunun Bakı-Sumqayıt şosesi, 129 ünvanında yanğın baş verməsi barədə məlumat daxil olub.

Nazirliyin mətbuat xidmətindən AZƏRTAC-a bildirilib ki, məlumatla əlaqədar dərhal FHN-in Dövlət Yanğından Mühafizə Xidməti Abşeron Rayon Yanğından Mühafizə Hissəsinin qüvvələri yanğının baş verdiyi əraziyə cəlb olunub.

Hadisə yerində əməliyyat şəraiti qiymətləndirilərkən yanğının vətəndaşa məxsus tikilidə baş verdiyi və genişlənərək bitişik digər obyektlərə keçmə riskinin yüksək olduğu müəyyənləşdirilib.

Yanğınsöndürmə qüvvələrinin çevik və peşəkar fəaliyyəti sayəsində yanğın genişlənməsinə imkan verilmədən qısa müddətdə söndürülüb.

Hadisə nəticəsində ümumi sahəsi 700 kvadratmetr olan tikilinin dam örtüyü 120 kvadratmetr sahədə, içərisində olan bəzi əşyalar yanıb.

Tikilinin qalan hissəsi və bitişik obyektlər alovdan mühafizə olunub.