Azərbaycanda yerli və beynəlxalq şirkət rəhbərlərinin zirvə toplantısı keçiriləcək

Noyabrın 15-də Azərbaycanda ilk dəfə yerli və beynəlxalq şirkətlərin baş icraçı direktorlarının, dövlət qurumlarının rəsmilərinin, sahibkarların iştirakı ilə idarəetmə sahəsində dünyada tətbiq olunan yeniliklər, bu sahədə müasir innovasiyalar və texnologiyanın inkişafı, qabaqcıl təcrübələr barədə dialoqlar, müzakirələr və fikir mübadilələrinin keçirilməsini hədəfləyən “Baku International CEO Summit” tədbiri (zirvə toplantısı) keçiriləcək.

 YeniAvropa xəbər verir ki, tədbirin təşkilatçısı Azərbaycan HR İnstitutudur.

"Baku International CEO Summit" Prezident İlham Əliyevin 2 fevral 2021-ci il tarixli sərəncamı ilə təsdiq edilmiş "Azərbaycan 2030: sosial iqtisadi-inkişafa dair növbəti illər ərzində reallaşdırılması planlaşdırılan “Milli prioritetlər”dən 1-cisi “Dayanıqlı artan rəqabətqabiliyyətli iqtisadiyyat” prioritetinə əsaslanaraq ölkəmizdə korporativ idarəetmənin daha da gücləndirilməsi üçün “Daha yaxşı gələcək naminə” şüarı ilə baş tutacaq.

“Bu tədbiri keçirməkdə məqsədimiz yerli və beynəlxalq şirkət rəhbərləri, dövlət qurumlarının vəzifəli şəxslərinin öz təcrübələrini bir-birləri ilə paylaşmasına imkan yaratmaq, o cümlədən dünyada idarəetmə sahəsində baş verən yenilikləri qlobal şirkət nümayəndələrinin dilindən eşitməkdir. Hazırda yerli və qlobal şirkətlərin rəhbərləri ilə danışıqlarımız davam edir. Onların bu tədbirə maraq göstərməsi və təcrübələrini paylaşmaq istəkləri bizim üçün sevindirici haldır. Tədbir 3 paneldən ibarət olacaq, hər panelin mövzusu 1 moderator və 4 əsas spiker tərəfindən təqdim olunacaq. Panellərdə həm yerli, həm beynəlxalq, həm də dövlət qurumlarının rəhbərləri çıxış edəcəklər. Tədbir iştirakçıları qlobal bazarda idarəetmə trendləri və onun gələcək imkanları, rəqəmsal transformasiya, yeni müştəri portreti və onun davranışları və s. maraq kəsb edən mövzularla bağlı yeni fikir və təcrübələrə sahib olacaqlar", - deyə Azərbaycan HR İnstitutunun direktoru Emil Hüseynov qeyd edib.

“Baku International CEO Summit” tədbirində iştirak etmək üçün biletləri https://ebilet.store/event_BICEO22/ linki vasitəsi ilə qeydiyyatdan keçib əldə etmək olar.

Azərbaycan HR İnstitutu bu il yanvarın 28-də “Baku International HR Forum” tədbiri də keçirib. 6 ölkədən 16 spiker və 300-dən çox iştirakçının qatıldığı forumda İnsan kapitalının inkişafı, gələcək innovasiyalar və idarəetmə panelləri üzrə peşəkar müzakirələr və qarşılıqlı təcrübə mübadiləsi aparılıb.