Vatsap yazışmalarının ələ keçirilməsi xidmətini təklif edən şəxs ifşa olunub

Sosial şəbəkələrdə və kütləvi informasiya vasitələrində “Aztechnolog” adlı instaqram səhifəsini idarə edən şəxslər tərəfindən maddi maraq zəminində istifadəçilərin müraciəti əsasında üçüncü şəxslərin vatsap tətbiqindəki yazışmalarının kibermüdaxilə yolu ilə gizli ələ keçirilməsi və izlənilməsi üçün təqdim olunması ilə bağlı yayılmış məlumatlar Dövlət Təhlükəsizliyi Xidməti(DTX) tərəfindən nəzarətə götürülərək araşdırılıb.

YeniAvropa xəbər verir ki, bu barədə DTX-nin Mətbuat xidmətindən bildirilib.

Qeyd edilib ki, Bakı şəhər sakini 2000-ci il təvəllüdlü Əsgərov Arif Həmid oğlunun instaqram sosial şəbəkəsində “Aztechnolog” (www.instagram.com/xakkerhuseyn) adı ilə qeydiyyatdan keçərək sözügedən səhifədə müəyyən pul müqabilində vatsap yazışmalarının ələ keçirilməsi və izlənilməsi məqsədilə elektron ünvan (keçid linki) təqdim edilməsinə dair bilərəkdən yalan məlumat yerləşdirdiyi, bu xidmət üçün müraciət edənlər pul vəsaitlərini Arif Əsgərovun sərəncamında olan bank kartı hesabına köçürərək, ödəniş barədə qəbzlərin surətini qeyd olunan instaqram səhifəsinə göndərdiyi, lakin sonra həmin şəxslərin müvafiq səhifəni idarə edən şəxslə əlaqə yaratma cəhdlərinin baş tutmadığı və onlara ödədikləri vəsaitin əvəzində heç bir xidmət təqdim edilmədiyi məlum olub.

Arif Əsgərov bu yolla mayın 25-dək olan müddətdə əməliyyat-axtarış fəaliyyətini həyata keçirmək səlahiyyətinə malik olmayan şəxs kimi gizli qaydada informasiya alınması üçün nəzərdə tutulmuş texniki vasitələrdən qanunsuz istifadə edilməklə belə tədbirlərin keçirilməsinə təhrik edib aldatdığı 394 nəfər şəxsin pul vəsaitlərini ələ keçirib.

Arif Əsgərov Dövlət Təhlükəsizliyi Xidmətində aparılan cinayət işi üzrə cinayət məsuliyyətinə cəlb olunub.

Hazırda araşdırmalar davam etdirilir.