ÜST: “Omikron” ilə koronavirus pandemiyası başa çatmayacaq

“Omikron” ştamının COVID-19 koronavirusunun sonuncu variantı olması və pandemiyanın bu ştamla başa çatacağı barədə şayiələr həqiqətə uyğun deyil: ştamın yayılmasının indiki səviyyəsində hər şey ola bilər.

 YeniAvropa xəbər verir ki, bu fikri  Ümumdünya Səhiyyə Təşkilatının(ÜST) aparıcı elmi işçisi Sumiya Svaminatan bu gün keçirdiyi brifinqdə səsləndirib.

ÜST nümayəndəsi jurnalistlərin suallarına cavab verərək, COVID-19-a qarşı vaksinlərin “buster” dozalarının tətbiqi məsələsinə də toxunub. O, bildirib ki, hazırda uşaqlara və yeniyetmələrə “buster” vaksin dozaları vurulmasının zəruri olmasını göstərən heç bir məlumat yoxdur.

Sumiya Svaminatanın sözlərinə görə, ÜST ekspertləri bu həftə toplaşaraq, əlavə vaksin dozalarının zəruriliyi və COVID-19 səbəbindən ölüm hallarının azaldılmasında bu dozaların rolu məsələsini müzakirə edəcəklər.

Ümumdünya Səhiyyə Təşkilatının məlumatına görə, son bir həftə ərzində COVID-19-a yeni yoluxma hallarının sayı 20 faiz artıb – ötən 7 gündə 19 milyon insan xəstələnib. ÜST-də xatırladırlar ki, bu rəqəmlər yalnız rəsmən qeydə alınmış halları əks etdirir və real rəqəmlər daha yüksək ola bilər. Həftə ərzində ölüm hallarının sayı dəyişməyib və təqribən 45 minə bərabər olub.

Ümumdünya Səhiyyə Təşkilatının rəhbəri Tedros Gebreyesusun sözlərinə görə, “ola bilsin, “omikron” ştamı orta hesabla infeksiyanın daha yüngül formalarına səbəb olur, lakin onun daha az təhlükəli olduğunu güman etmək səhvdir. Belə münasibət pandemiyaya qarşı mübarizə tədbirlərinə mənfi təsir göstərir və bizə itirilmiş həyatlar bahasına başa gələ bilər”.