"Tokio-2020" : Bu gün Azərbaycanın 6 idmançısı mübarizə aparacaq

"Tokio-2020" Yay Olimpiya Oyunları davam edir. Olimpiadanın dördüncü günündə - iyulun 26-da Azərbaycanın 6 idmançısı mübarizə aparacaq.

YeniAvropa xəbər verir ki, atletlərimiz idmanın 5 növündə güclərini sınayacaqlar.

Yarış gününə kişilər arasında triatlon turniri ilə start veriləcək. Yarışda ölkəmizi Rostislav Pevtsov təmsil edəcək.

Qadın qılıncoynadanımız Anna Başta sablya yarışlarında gücünü sınayacaq.

Stend atıcılığı yarışlarında təmsilçimiz Emin Cəfərov medallar uğrunda mübarizə aparacaq.

Taekvondo yarışlarında iki təmsilçimiz dayanq üzərinə çıxacaq. Azərbaycan komandasının bayraqdarı Fəridə Əzizova (67 kq) ABŞ idmançısı Peyc Makferson, Milad Beiqi Harçeqani (80 kq) isə Vei-Tinq Liu (Çin Taypeyi) ilə qarşılaşacaq.

Cüdo yarışlarının üçüncü günüdə bir idmançımız tatamiyə çıxacaq. Kişilərin yarışında mübarizə aparacaq digər bayraqdarımız Rüstəm Orucov (73 kq) Rusiya Olimpiya Komitəsinin idmançısı Musa Moquşkov ilə üz-üzə gələcək.

Azərbaycan milli komandası “Tokio-2020”də 44 idmançı ilə təmsil olunur. Ölkəmiz yeddinci dəfədir Yay Olimpiya Oyunlarında iştirak edir. Olimpiya komandamız, həmçinin 6 Qış Olimpiya Oyunlarında gücünü sınayıb. Milli komandamızın Olimpiya Oyunlarında debütü “Atlanta-1996” Qış Olimpiya Oyunlarına təsadüf edib. Azərbaycan komandası medalların sayına görə ən böyük uğurunu “Rio-2016”da qazanıb. Həmin Olimpiadaya 56 idmançı ilə qatılan komandamız 1-i qızıl, 7-si gümüş və 10-u bürünc olmaqla ümumilikdə 18 medala sahib olub.

“Tokio-2020”də ən böyük heyət ABŞ komandasına məxsusdur. Yarışda ABŞ-ı 613 atlet təmsil edəcək. Andorra, Bermud Adaları, Bruney, Dominik, Lesoto, Mavritaniya, Marşal Adaları, Nauru, Somali, Tuvalu, Mərkəzi Afrika Respublikası və Cənubi Sudan 2 idmançı ilə təmsil olunur. Dördilliyin zirvə yarışında, həmçinin qaçqınlardan ibarət və BOK-un komandaları iştirak edir.

Turnirin ən az yaşlı idmançısı suriyalı Hend Zazadır. On iki yaşlı idmançı stolüstü tennis yarışlarında gücünü sınayacaq. Ən yaşlı idmançı – 66 yaşlı avstraliyalı Meri Hanna isə atçılıq yarışlarında mübarizə aparacaq.