logo

Kiçik çillə yerini Boz aya verdi 

11:51 21-02-2021 | icon 4207
Kiçik çillə yerini Boz aya verdi 

Xalq təqviminə görə, iyirmi gün çəkən Kiçik çillə fevralın 21-də öz yerini Boz aya (21 fevral – 21 mart) təhvil verib.

YeniAvropa xəbər verir  ki, fevralın 23-də Baharın müjdəçisi olan Su Çərşənbəsi  qeyd ediləcək.

Xatırladaq ki, qış fəsli dekabrın 21-də başlayıb.

Xalq təqviminə görə, qış fəsli 3 hissəyə bölünür: Böyük çillə ,Kiçik çillə  və Boz ay. 

Bu təqvimə əsasən Böyük Çillə 40 gün-dekabrın 21-dən yanvarın 31-dək davam edir. Sonra Kiçik çillə  başlayır və 20 gün-yanvarın 31-dən fevralın 21-dək davam edir. Onlardan sonra Novruz bayramınadək qalan 30 gün-fevralın 21-dən martın 21-dək Boz ay adlanır. 

Müşahidələrə görə, adətən Böyük çillədən fərqli olaraq, Kişik çillə dövründə daha kəskin soyuqlar müşahidə edilir, sərt şaxtalar olur. Eyni zamanda qar yağır. Ona görə də Kiçik Çilləyə “qışın oğlan çağı” da deyirlər.

Amma Kiçik Çillənin bitməsi şaxtalı havaların bitməsi demək deyil. Boz ay da kifayət qədər sərtliyini hiss etdirə bilir.

Boz ay dövründə iqlim təzadlı keçsə də, əkinçilikdə bəzi işlərin görülməsinə başlanılır.  Elə baharın müjdəçisi hesab olunan novruzgülü də adətən Kiçik çillənin sonu, Boz ayın əvvəlində açır. Etnoqraflar deyirlər ki, novruzgülü Boz ay girməmiş heç vaxt açmır. 

Qeyd edək ki, bu il Azərbaycanda yaz fəsli martın 20-də yerli vaxtla saat 13:37-yə başlayacaq.

AMEA-nın Şamaxı Astrofizika Rəsədxanasının məlumatına görə, bu il fevralın 23-də ilk - Su çərşənbəsi, martın 2-də Od, martın 9-da Hava (Yel), martın 16-da isə axırıncı - Torpaq çərşənbəsi qeyd olunacaq.

Nazirlər Kabinetinin "2021-ci il üçün Novruz, Ramazan və Qurban bayramları günlərinin müəyyən edilməsi haqqında” qərarına əsasən, 2021-ci il martın 20, 21, 22, 23, 24-ü Novruz bayramı günləri müəyyən edilib.

Bu il 20-21 mart həftənin şənbə və bazar günlərinə təsadüf etdiyindən, Əmək Məcəlləsinə əsasən, iş və istirahət günlərinin yerləri dəyişdiriləcək, martın 25-i və 26-ı da qeyri-iş günü olacaq. Eyni zamanda 27 və 28 mart da həftənin şənbə və bazar günlərinə təsadüf edir.   

Beləliklə, Novruz bayramı ilə əlaqədar 9 gün ardıcıl (20, 21, 22, 23, 24, 25, 26, 27 və 28 mart) iş olmayacaq.