logo

Bu il 43 min 412 nəfər ali təhsil müəssisələrinə qəbul olunub

18:11 24-09-2020 | icon 3052
Bu il 43 min 412 nəfər ali təhsil müəssisələrinə qəbul olunub

Ali təhsil müəssisələrinin müsabiqəsində 66 min 464 nəfər iştirak edib. Onlardan 42 min 731 nəfəri (o cümlədən 5785 subbakalavr) ali təhsil müəssisələrinə qəbul olunub. 20 min 799 (o cümlədən 779 subbakalavr) nəfər dövlət sifarişi əsasında, 21 min 932 (o cümlədən 5006 subbakalavr) nəfər isə ödənişli əsaslarla təhsil almaq hüququ əldə edib.

 YeniAvropa xəbər verir ki, bu barədə Dövlət İmtahan Mərkəzinin Direktorlar Şurasının sədri Məleykə Abbaszadə bu gün keçirdiyi brifinqdə bildirib. Diqqətə çatdırıb ki, bu il 2 nəfər beynəlxalq, 28 nəfər respublika fənn olimpiadalarının, 74 nəfər idman sahəsi üzrə beynəlxalq yarışların qalibi olduğu üçün, 10 nəfər beynəlxalq səviyyədə akkreditasiya olunan təhsil proqramları (IB Diploma Programme) üzrə təhsil aldığı üçün müsabiqədənkənar ali təhsil müəssisələrinə qəbul olunub.

Həmçinin 160 abituriyent SAT imtahanının nəticələrinə əsasən, 30 abituriyent ADA məktəbinin məzunu kimi ADA Universitetinə qəbul olunub.

Bundan əlavə, I ixtisas qrupu 146 abituriyent Azərbaycan-Fransız Universitetinə (UFAZ), IV ixtisas qrupu üzrə 121 abituriyent İ.M.Seçenov adına Birinci Moskva Dövlət Tibb Universitetinin Bakı filialına, 110 abituriyent (I-IV ixtisas qrupları üzrə) M.V.Lomonosov adına Moskva Dövlət Universitetinin Bakı filialına qəbul olunub.

Ümumilikdə 45 mülki ali təhsil müəssisəsinə və 7 xüsusi təyinatlı (Polis Akademiyası, DTX Akademiyası, Sərhəd Xidmətinin Akademiyası, Ali Hərbi Məktəb, Daxili Qoşunların Ali Hərbi Məktəbi, FHN Akademiyası, Tibb Universitetinin Hərbi həkim işi) ali təhsil müəssisəsinə qəbul aparılıb. Qeyd olunmalıdır ki, vətənpərvərlik, milli-mənəvi şüurun təbliği və aşılanması işinin ən yüksək səviyyəyə çatdırılması indiki dövrdə ölkəmiz üçün ən vacib məsələlərdəndir. Bunun nəticəsidir ki, cari ildə xüsusi təyinatlı ali təhsil müəssisələrinə müraciət edənlərin sayı və yüksək balla qəbul olunanların sayı artıb.

Beləliklə, bu il həm müsabiqə nəticəsində, həm müsabiqədənkənar, həm ölkəmizdə fəaliyyət göstərən xarici dövlətlərin ali təhsil müəssisələrinə qəbul olanların sayı 43412 nəfər təşkil edib. (Xüsusi təyinatlı ali təhsil müəssisələrinə qəbul olanların sayı açıqlanmadığı üçün bu rəqəm ümumi saya əlavə olunmayıb).