Azərbaycan, Gürcüstan və Türkiyə arasında hərbi əməkdaşlıq məsələləri diqqət mərkəzindədir.
YeniAvropa xəbər verir ki, bu fikirlər Gürcüstanın Müdafiə naziri İrakli Qaribaşvilinin Türkiyəyə səfəri ilə əlaqədar nazirliyin yaydığı məlumatda qeyd olunub.
Bildirilib ki, səfər çərçivəsində Türkiyənin Milli Müdafiə naziri Hulusi Akar ilə görüşdə iki ölkə arasında müdafiə sahəsində əməkdaşlığın gücləndirilməsi ilə bağlı məsələlər müzakirə olunub. Tərəflər, eyni zamanda, Azərbaycan, Gürcüstan və Türkiyə arasında hərbi əməkdaşlığın perspektivlərini nəzərdən keçiriblər. Söhbət zamanı üçtərəfli əməkdaşlığın genişləndirilməsinin əhəmiyyəti vurğulanıb.
İ.Qaribaşvili Gürcüstanın suverenliyinə və ərazi bütövlüyünə göstərdiyi dəstəyə görə Türkiyə hökumətinə minnətdarlığını bildirib. O, Türkiyə tərəfinə Gürcüstanda müdafiə sahəsində həyata keçirilən islahatlar barədə məlumat verib.
Bildirilib ki, Türkiyə hökuməti Gürcüstanın Müdafiə Nazirliyinə 100 milyon türk lirəsi (təqribən 17 milyon dollar) məbləğində qrant ayırıb. İrakli Qaribaşvili və Hulusi Akar bununla bağlı saziş imzalayıblar.
Sənədə əsasən, vəsait Gürcüstanın müdafiə sahəsində maddi-texniki bazasının gücləndirilməsinə sərf olunacaq.
Səfər çərçivəsində Gürcüstanın Müdafiə naziri və nümayəndə heyətinin üzvləri Türkiyə Respublikasının qurucusu Mustafa Kamal Atatürkün məzarı ziyarət ediblər.
2352
2352
