Milli Məclisinin deputatları Tahir Mirkişili və Rasim Musabəyov bu gün Gürcüstanın paytaxtı Tbilisidə öz işinə başlayan Avronest Parlament Assambleyasının (PA) VIII illik sessiyasında iştirak edirlər.
YeniAvropa xəbər verir ki, bu barədə Milli Məclisdən bildirilib. Qeyd edilib ki, “Şərq Tərəfdaşlığı”nın gələcək perspektivləri” adlı sessiya iki gün davam edəcək.
Sessiyada və sessiya çərçivəsində keçiriləcək qurumun müvafiq komitələrində “Avropa İttifaqı və Şərq Tərəfdaşlığı ölkələrində təhsil sahəsində islahatlar: çağırışlar və imkanlar”, “Şərq Tərəfdaşlığı ölkələrində demokratiya, dövlət qurumlarının hesabatlılığı və səmərəliliyinin möhkəmləndirilməsində parlament nəzarəti bir vasitə kimi”, “Enerji sektorunda həmrəylik və yaxınlaşma – mütərəqqi normativ tənzimləmə bazasına doğru”, “Avropa İttifaqı və Şərq Tərəfdaşlığı ölkələrində iqtisadi artımı stimullaşdırmaq və səmərəliliyi artırmaq üçün rəqəmsallaşdırmanın asanlaşdırılması” mövzularında müzakirələr aparılacaq.
Xatırladaq ki, Avropa İttifaqının “Şərq Tərəfdaşlığı” proqramı çərçivəsində yaradılan Avronest PA-da Azərbaycan, Gürcüstan, Moldova, Ukrayna, Belorus və Ermənistandan olan qanunverici orqanların nümayəndələri təmsil olunurlar.
2534
2534
