Oktyabrın 13-14-də Bakıda ilk dəfə Beynəlxalq Nəqliyyat Forumu keçiriləcək.
YeniAvropa xəbər verir ki, bu barədə Dövlət Avtomobil Nəqliyyatı Xidmətinin İctimaiyyətlə əlaqələr sektorunun müdiri Nuridə Allahyarova məlumat verib.
O bildirib ki, Beynəlxalq Nəqliyyat Forumu dünyanın ən iri nəqliyyat koalisiyasıdır və 57 üzvü var. Azərbaycan bu qurumun həqiqi üzvlərindəndir: “Prezident İlham Əliyev bu ilin avqustun 28-də “Avtomobil nəqliyyatı haqında” Qanuna dəyişikliklər edilməsinə dair fərman imzalayıb. Fərmana uyğun olaraq Azərbaycan artıq beynəlxalq sərnişin və yükdaşımalarında Beynəlxalq Nəqliyyat Forumunun keyfiyyət xartiyasına uyğun davranmağı öhdəlik götürüb. Bu o deməkdir ki, Azərbaycan beynəlxalq sərnişin və yükdaşımalarında Beynəlxalq Nəqliyyat Forumunun keyfiyyət xartiyasının tələbləri ilə iştirak edəcək”.
“Beynəlxalq Nəqliyyat Forumunun keyfiyyət xartiyasının tələblərinə uyğun fəaliyyət göstərmək bizim daşıyıcıların çoxtərəfli icazələrdən yararlanmasına imkan verəcək. Bu zaman üzv ölkələrin ərazisindən rahat şəkildə tranzit keçid kimi istifadə edə biləcəyik. Beynəlxalq Nəqliyyat Forumunun Bakı sessiyasında 57 ölkədən 100-dək nümayəndə iştirak edəcək. Belə bir forumun Azərbaycanda keçirilməsi ölkəmizin bu sahədə çox böyük uğurlara imza atmasının göstəricisidir”, - deyə N.Allahyarova əlavə edib.
2709
2709
