logo

Elmar Məmmədyarov AŞ PA-nın prezidenti ilə görüşüb

20:53 12-09-2019 | icon 357
Elmar Məmmədyarov AŞ PA-nın prezidenti ilə görüşüb

Azərbaycanın xarici işlər naziri Elmar Məmmədyarov sentyabrın 12-də  ölkəmizdə səfərdə olan Avropa Şurası Parlament Assambleyasının (AŞ PA) prezidenti xanım Lilian Mori Paskie ilə görüşüb.

Nazirliyin mətbuat xidmətindən YeniAvropa-ya bildiriblər ki, görüşdə Lilian Mori Paskie dövlətimizin başçısı tərəfindən qəbul edilməsini yüksək dəyərləndirdiyini bildirib və təşkilat çərçivəsində Azərbaycan ilə mövcud münasibətlərin hazırkı durumu, əməkdaşlığın cari inkişaf səviyyəsi və perspektivləri barəsində Azərbaycan Respublikasının prezidenti və Milli Məclisin sədri ilə məhsuldar fikir mübadiləsi apardığını qeyd edib.

Elmar Məmmədyarov Azərbaycan ilə AŞ PA arasında mövcud olan qarşılıqlı faydalı əməkdaşlığın əhəmiyyətini vurğulayıb və Azərbaycan tərəfinin Avropa Şurası və onun institutları ilə əməkdaşlığı davam etdirməkdə maraqlı olduğunu diqqətə çatdırıb.

Daha sonra Lilian Mori Paskie Avropa Şurasında aparılan islahatlar, o cümlədən təşkilatda ortaya çıxan problemlərin aradan qaldırılması üçün yaradılan yeni mexanizmlər haqında danışıb. Avropa Şurasının 70 illiyindən söz açan AŞ PA prezidenti bu münasibətlə səfəri çərçivəsində Azərbaycanda da belə bir tədbirin keçirilməsinə göstərilən dəstəyə görə təşəkkürünü ifadə edib.

Söhbət əsnasında Elmar Məmmədyarov Ermənistan-Azərbaycan Dağlıq Qarabağ münaqişəsinin həlli istiqamətində aparılan danışıqların son vəziyyəti ilə bağlı qonağı geniş məlumatlandırıb.

Sonra tərəflər arasında qarşılıqlı maraq doğuran digər regional və beynəlxalq məsələlər ətrafında fikir mübadiləsi aparılıb.