logo

Gömrük Komitəsi “Mutlu” akkumlyatorları ilə bağlı qalmaqallı məsələyə aydınlıq gətirdi

12:58 18-07-2019 | icon 3129
Gömrük Komitəsi “Mutlu” akkumlyatorları ilə bağlı qalmaqallı məsələyə aydınlıq gətirdi

Ötən gün bəzi kütləvi informasiya vasitələrində Dövlət Gömrük Komitəsinin Enerji Resursları və Dəniz Nəqliyyatında Baş Gömrük İdarəsi haqqında həqiqətə uyğun olmayan, böhtan xarakterli ittihamlar irəli sürülüb.

YeniAvropa xəbər verir  ki, bu barədə Dövlət Gömrük Komitəsinin Mətbuat və İctimaiyyətlə Əlaqələr İdarəsindən daxil olan məlumatda bildirilir. Qeyd edilib ki, “Rovel Trading” şirkətinin direktoru İntiqam Həsənovun verdiyi iddia edilən məlumatlarda guya Enerji Resursları və Dəniz Nəqliyyatında Baş Gömrük İdarəsi tərəfindən adı çəkilən şirkətin mallarının sənədlərində uyğunsuzluq olmadığı halda qanunsuz şəkildə saxlanıldığı və qanunla müəyyən edilən miqdardan artıq gömrük ödənişlərinin tələb olunduğu deyilir.

“Rovel Trading” MMC “Dörtel Otomotiv San ve Pazarlama Tic. Ltd. Şti” şirkətindən idxal edilən “Mutlu” markalı müxtəlif növ elektrik akkumlyatorlarının gömrük rəsmiləşdirilməsinin aparılması üçün cari ilin iyul ayının 8-də Enerji Resursları və Dəniz Nəqliyyatında Baş Gömrük İdarəsinə müraciət edib. Qeyd olunan malların gömrük rəsmiləşdirilməsi zamanı Azərbaycan Respublikası Gömrük Məcəlləsinin 221-ci maddəsinə, həmçinin “Gömrük tarifi haqqında” Azərbaycan Respublikası Qanunun 12.1.2-ci maddəsinə, yəni gömrük dəyərinin müəyyən edilməsinin 2-ci üsuluna əsasən araşdırma aparılıb. Araşdırma nəticəsində idxal olunan “Mutlu” markalı müxtəlif növ elektrik akkumlyatorlarının gömrük dəyəri ilə bundan əvvəl ən yaxın tarixdə həmin şirkət tərəfindən gətirilən eyni adda malların dəyəri arasında 10 min 200 manat kəskin fərqin olduğu müəyyənləşdirilib. Bu səbəbdən həmin gömrük bəyannamələrində gömrük dəyərinə müvafiq düzəlişlərin edilməsi barədə qeydlər aparılıb və “Rovel Trading” MMC-yə məktubla məlumat verilib.

Saxlanc xüsusi gömrük proseduru altında malların gömrük rəsmiləşdirilməsi Azərbaycan Respublikasının Gömrük Məcəlləsinin 176-178-ci maddələrinin və Azərbaycan Respublikasının Nazirlər Kabinetinin 2013-cü il 27 avqust tarixli Qərarı ilə təsdiq edilən “Malların saxlanc xüsusi gömrük proseduru altında yerləşdirilməsi Qaydaları”nın tələblərinə uyğun həyata keçirilməlidir. Malların müvəqqəti saxlanc xüsusi gömrük proseduru altında yerləşdirilməsi zamanı gömrük orqanları prosedur sahibindən yarana biləcək gömrük borcuna görə təminat tələb etmək hüququna malikdir.

Eyni zamanda, Gömrük Məcəlləsinin 250.4-cü maddəsinə əsasən təminatın məbləğini gömrük orqanları müəyyən edir və bu məbləğ malların və nəqliyyat vasitəsinin sərbəst dövriyyə üçün buraxılış gömrük proseduru üçün nəzərdə tutulmuş gömrük ödənişlərinə ekvivalent məbləğdə təyin olunur.

Azərbaycan Respublikasının Gömrük Məcəlləsinin 163.3-cü maddəsinə əsasən gömrük orqanları malların bəyan edildiyi gömrük proseduruna və bu Məcəllənin 45-ci fəslinə uyğun olaraq gömrük ödənişlərinə təminat verilməsini tələb etdikdə, həmin tələb yerinə yetirilməyənədək mallar müvafiq gömrük proseduruna buraxılmır.

Həmçinin bu “Rovel Trading” MMC-nin gömrük qanunvericiliyini pozması ilə bağlı ilk cəhdi deyil. Belə ki, həmin şirkət Bakı şəhəri Binəqədi Rayon Məhkəməsinin qərarı ilə 2017-ci ildə İnzibati Xətalar Məcəlləsinin 491.1 maddəsinin tələblərini pozduğuna görə 57 min 481 manat məbləğində cərimə olunub.